கொசு உற்பத்தியை தடுக்க வேண்டும்…
பருவநிலை மாற்றத்தால் டெங்கு அபாயம் அதிகரித்து வருவதாக மருத்துவ நிபுணர்கள் எச்சரிக்கை விடுத்துள்ளனர்.
தமிழகத்தில் கோடை வெயில் தீவிரமடைந்துள்ள நிலையில், பல்வேறு இடங்களில் மழையும் பெய்து வருகிறது. இதன் காரணமாக தேங்கிய நீரில் கொசுக்கள் அதிக அளவில் உருவாகும் சூழல் ஏற்பட்டுள்ளது.
குறிப்பாக டெங்கு காய்ச்சலை பரப்பும் ஏடிஸ் வகை கொசுக்கள் வேகமாக பெருகி வருவதாக கூறப்படுகிறது. இதனால் பொதுமக்கள் மிகவும் எச்சரிக்கையுடன் இருக்க வேண்டும் என சுகாதாரத்துறை அறிவுறுத்தியுள்ளது.
வீடுகள் மற்றும் சுற்றுப்புறங்களில் தண்ணீர் தேங்க விடாமல் பார்த்துக்கொள்ள வேண்டும். பழைய டயர்கள், பிளாஸ்டிக் பொருட்கள், குடங்கள் உள்ளிட்டவற்றில் நீர் தேங்காமல் சுத்தம் செய்ய வேண்டும் என அதிகாரிகள் தெரிவித்துள்ளனர்.
டெங்கு காய்ச்சலின் அறிகுறிகளாக அதிக காய்ச்சல், தலைவலி, உடல்வலி, வாந்தி, சோர்வு போன்றவை காணப்படும். இத்தகைய அறிகுறிகள் இருந்தால் உடனடியாக அருகிலுள்ள மருத்துவமனைக்கு சென்று பரிசோதனை செய்து கொள்ள வேண்டும் என மருத்துவர்கள் அறிவுறுத்தியுள்ளனர்.
மேலும், கொசு ஒழிப்பு பணிகளை தீவிரப்படுத்த மாவட்ட நிர்வாகம் நடவடிக்கை மேற்கொண்டு வருகிறது. பொதுமக்களும் ஒத்துழைத்து சுற்றுச்சூழலை சுத்தமாக வைத்திருக்க வேண்டும் என கேட்டுக்கொள்ளப்பட்டுள்ளது.